மேல் கொத்மலை நீர்த்தேக்கத்தின் ஒரு வான் கதவு இன்று (24) திறந்துவிடப்பட்டுள்ளதாக நீர்த்தேக்கத்திற்கு பொறுப்பான பொறியியலாளர்கள் தெரிவித்துள்ளனர்.
நீர்த்தேக்கத்தின் நீரேந்து பகுதிகளில் இன்று அதிகாலை முதல் பெய்து வரும் பலத்த மழை காரணமாகவே இந்நடவடிக்கை எடுக்கப்பட்டுள்ளது.
மேல் கொத்மலை நீரேந்து பகுதிகளில் மேலும் கனமழை பெய்யும் பட்சத்தில், நீர்த்தேக்கத்தின் ஏனைய வான் கதவுகளும் தானியங்கி முறையில் திறக்கப்படும்.
இதன் காரணமாக, நீர்த்தேக்க அணைக்கட்டிற்கு கீழ் பகுதியில் அமைந்துள்ள கொத்மலை ஓயாவின் இருமருங்கிலும் வசிக்கும் மக்கள் அவதானத்துடன் இருக்குமாறு அனர்த்த முகாமைத்துவ பிரிவு கேட்டுக்கொண்டுள்ளது.
அத்துடன், அப்பகுதியில் பெய்து வரும் பலத்த மழையினால் சென் கிளையார் மற்றும் டெவோன் நீர்வீழ்ச்சிகளின் நீர்மட்டமும் உயர்ந்துள்ளதாகத் தெரிவிக்கப்படுகிறது.
