நாட்டில் நிலவிவரும் கடுமையான வறண்ட காலநிலை காரணமாகக் காய்கறித் தட்டுப்பாடு ஏற்படும் அபாயம் ஆரம்பமாகியுள்ளதாக வியாபாரிகள் தெரிவித்தனர்.
தம்புள்ளை பொருளாதார மைய வர்த்தகர்கள் சங்கத்தின் தலைவர் சி. ஏ. சிரிவர்தன ஊடகங்களிடம் தெரிவிக்கையில், பொருளாதார மையத்திற்கு விநியோகிக்கப்படும் காய்கறிகளின் அளவு நாளொன்றுக்கு 200,000 கிலோகிராம்களால் குறைந்துள்ளதாகக் கூறினார். கடந்த சில நாட்களாக நாளாந்த விநியோகம் 600,000 கிலோகிராம்களிலிருந்து 400,000 கிலோகிராம்களாகக் குறைந்துள்ளது. நிலவும் வறட்சியும், உரத் தட்டுப்பாட்டுமே இத்தகைய நிலைமைக்குக் காரணம் என அவர் மேலும் குறிப்பிட்டார்.
இதற்கமைய, போிச்சங்காயின் (Capsicum) மொத்த விற்பனை விலை ஒரு கிலோகிராம் 500 முதல் 550 ரூபாவாகவும், கரட்டின் விலை 230 முதல் 250 ரூபாவாகவும் காணப்படுகிறது. கத்தரிக்காய் ஒரு கிலோகிராம் 350 ரூபாவாகவும், முருங்கைக்காய் 150 முதல் 200 ரூபாவாகவும், பூசணிக்காய் ஒரு கிலோகிராம் 115 ரூபாவாகவும் விற்கப்படுகிறது.
இதற்கிடையில், முன்னாள் மாட்டின் சந்தை (Manning Market) வர்த்தகர்கள் சங்கத்தின் தலைவர் எஸ். எம். உபசேன கூறுகையில், நாடு காய்கறித் தட்டுப்பாட்டை எதிர்நோக்கத் தொடங்கியுள்ளதாகத் தெரிவித்தார். இத்தட்டுப்பாட்டுக்கு வறண்ட காலநிலையே காரணம் எனவும் அவர் குற்றம் சாட்டினார். “நீர்த்தேக்கங்கள் மற்றும் குளங்களின் நீர்மட்டம் குறைந்து வருவதால், விவசாயிகள் தற்போது காய்கறி பயிரிடுவதைத் தவிர்த்து வருகின்றனர்” என்றார்.
இருப்பினும், குறைந்த தேவை காரணமாகக் காய்கறிகளின் விலைகள் உடனடியாக அதிகரிக்க வாய்ப்பில்லை என அவர் கூறினார். “மக்களிடம் அவசியமான தேவைகளுக்கே பணமில்லாததால், காய்கறிகளுக்கான தேவை குறைந்த அளவிலேயே உள்ளது” என உபசேன குறிப்பிட்டார்.
மேலும், காய்கறிகளைப் பொறுத்தவரை அவற்றைச் சேமித்து வைத்துப் பாதுகாப்பு இருப்புக்களை (buffer stocks) பராமரிக்க முடியாது என்பதே பிரச்சினையாக உள்ளதாகவும் அவர் தெரிவித்தார். “காய்கறி தொடர்பான இந்தச் சிக்கல் கடுமையான பரிமாணங்களை எட்டக்கூடும்” என்றும் அவர் மேலும் எச்சரித்தார்.
