மத்திய கிழக்கில் நிலவும் போர் சூழ்நிலையை எதிர்கொண்டு அடுத்த கட்ட நடவடிக்கைகள் குறித்து சிறப்பு கலந்துரையாடல் இன்று (15) மதியம் ஜனாதிபதி செயலகத்தில் இடம்பெற்றது.
மத்திய கிழக்கில் நிலக்கரி, எரிவாயு, எண்ணெய் போன்ற எரிசக்தி விநியோக வலையமைப்புகள் எதிர்கொள்ளும் தடைகள், அந்த தடைகளை எதிர்கொண்டு தொடர்ச்சியான எரிபொருள் விநியோகத்திற்காக ஒவ்வொரு துறையும் தற்போது எடுத்துள்ள நடவடிக்கைகள் மற்றும் முன்மொழியப்பட்ட மாற்றுகள் ஆகியவை மதிப்பாய்வு செய்யப்பட்டன.
எரிபொருளைச் சிக்கனமாகப் பயன்படுத்துவதை உறுதிப்படுத்தும் நோக்கில், அரச ஊழியர்கள் வீட்டிலிருந்து பணியாற்றுவதற்கான சாத்தியக்கூறுகள் குறித்து ஆராய்ந்து அறிக்கை சமர்ப்பிக்குமாறு ஜனாதிபதி ஆலோசனை வழங்கியுள்ளார்.
சுகாதார சேவைகளைத் தடையின்றி முன்னெடுப்பதில் விசேட கவனம் செலுத்தப்பட்டதுடன், அதற்காக அத்தியாவசிய எரிபொருள் கையிருப்புகளைப் பிரதேச ரீதியாகப் பேணுவதற்கான சாத்தியக்கூறுகள் குறித்து ஆராயுமாறும் அறிவுறுத்தப்பட்டுள்ளது.
வீட்டிலிருந்து சரியான திட்டமிடலுடன் பணிபுரிதல் போன்ற மாற்று முறைகளை செயல்படுத்துவதன் மூலம் தேசிய பொருளாதாரத்தில் ஏற்படும் தாக்கத்தை குறைக்க முடியும் என்றும், எழும் புதிய சூழ்நிலைகள் குறித்து பொதுமக்களுக்கு தொடர்ந்து தெரிவிக்கும் வழக்கமான தகவல்தொடர்புகளைப் பராமரிக்க வேண்டிய அவசியம் உள்ளது என்றும் ஜனாதிபதி சுட்டிக்காட்டியுள்ளார்.
தற்போதைய நெருக்கடிக்கு மத்தியில் கல்வி உள்ளிட்ட ஏனைய துறைகளை எவ்வாறு தொடர்ந்து முன்னெடுத்துச் செல்வது என்பது குறித்தும் இங்கு ஆலோசிக்கப்பட்டது.
விவசாயம், மீன்பிடி மற்றும் கைத்தொழில் துறைகளுக்கான எரிபொருள் தேவைகளைப் பூர்த்தி செய்வதற்காக டிஜிட்டல் குறியீட்டு (QR) முறையை விரைவாக முறைப்படுத்துவதன் அவசியத்தை ஜனாதிபதி சுட்டிக்காட்டியுள்ளார்.
