இலங்கையின் புதிய பிரதம நீதியரசராக, நீதியரசர் பிரீத்தி பத்மன் சூரசேன ஜனாதிபதி செயலகத்தில் ஜனாதிபதி அனுரகுமார திசாநாயக்க முன்னிலையில் ஞாயிற்றுக்கிழமை (27) காலை பதவியேற்றார். இவர், இலங்கையின் 49வது நீதியரசராவார்.
முன்னாள் பிரதம நீதியரசர் முர்து நிருபா பிதுஷினி பெர்னாண்டோ ஓய்வு பெற்றதால் ஏற்பட்ட வெற்றிடத்துக்கு நீதியரசர் சூரசேனவின் பெயர், ஜனாதிபதியால் அரசியலமைப்பு சபைக்கு அனுப்பப்பட்டது. அரசியலமைப்பு சபையால் சமீபத்தில் அங்கீகரிக்கப்பட்டது.
1989 ஆம் ஆண்டு வழக்கறிஞர் சங்கத்திற்கு அழைக்கப்பட்ட பிரீத்தி பத்மன் சூரசேன, பின்னர் சட்டமா அதிபர் துறையில் இணைந்து, அரசு வழக்கறிஞராக பணியாற்றினார். 2007 ஆம் ஆண்டு உயர் நீதிமன்ற நீதியரசராக நியமிக்கப்பட்டார்.
2016 ஆம் ஆண்டு, மேன்முறையீட்டு நீதிமன்ற நீதியரசராக நியமிக்கப்பட்டார், 2018 ஆம் ஆண்டு மேன்முறையீட்டு நீதிமன்றத்தின் தலைவராகவும், 2019 ஆம் ஆண்டு உயர் நீதிமன்ற நீதியரசராகவும் நியமிக்கப்பட்டார். அப்போதிருந்து, பிரீத்தி பத்மன் சூரசேன உயர் நீதிமன்ற நீதியரசராக பணியாற்றி வருகிறார்.
