நாட்டில் நிலவும் சீரற்ற காலநிலையை கருத்தில் கொண்டு மேலும் 5 மாவட்டங்களுக்கு மண்சரிவு அபாய எச்சரிக்கை விடுக்கப்பட்டுள்ளது.
நேற்று (07) பிற்பகல் 3 மணி முதல் இன்று (08) பிற்பகல் 3 மணி வரை அமுலுக்கு வரும் வகையில் இந்த எச்சரிக்கை அறிவிப்பு வெளியிடப்பட்டுள்ளதாக தேசிய கட்டிட ஆராய்ச்சி நிறுவனம் தெரிவித்துள்ளது.
இதன்படி, ஹம்பாந்தோட்டை, மாத்தறை, கேகாலை, நுவரெலியா மற்றும் இரத்தினபுரி ஆகிய மாவட்டங்களுக்கு மண்சரிவு அபாய எச்சரிக்கை விடுக்கப்பட்டுள்ளது.
இதேவேளை, அனர்த்தத்தினால் பாதிக்கப்பட்ட மக்களுக்கு உடனடியாக நிவாரணம் வழங்க நடவடிக்கை எடுக்கப்படும் என போக்குவரத்து மற்றும் வெகுஜன ஊடக அமைச்சர் பந்துல குணவர்தன தெரிவித்துள்ளார்.
வெள்ளத்தினால் பாதிக்கப்பட்ட மக்களின் மீட்புப் பணிகளுக்காக நாவலப்பிட்டி பிரதேசத்துக்கு விஜயம் செய்ததன் பின்னர் அமைச்சர் பந்துல குணவர்தன இந்தக் கருத்துகளை வெளியிட்டார்.
இதேவேளை, மண்சரிவு மற்றும் மண்சரிவு காரணமாக தடைப்பட்டிருந்த மலையக ரயில் சேவைகள் நாளை (09) முதல் வழமைக்குக் கொண்டுவரப்படும் என ரயில்வே திணைக்களம் தெரிவித்துள்ளது.
மலையக ரயில் பாதையில் மண்சரிவு காரணமாக கொழும்பு கோட்டைக்கும் பதுளைக்கும் இடையில் இயக்கப்படவிருந்த பல ரயில் பயணங்கள் அண்மையில் இரத்து செய்யப்பட்டமை குறிப்பிடத்தக்கது.
