இலங்கைக்கு வெளியிலிருந்து வீசும் காற்று நீரோட்டங்கள் காரணமாக, நாட்டின் பல பகுதிகளிலும் வளிமண்டலத்தில் நுண்துகள்களின் அளவு அதிகரித்துள்ளதாக மத்திய சுற்றாடல் அதிகாரசபை (CEA) தெரிவித்துள்ளது.
காற்றின் தரத்தைக் கண்காணிக்கும் தரவுகளின்படி, யாழ்ப்பாணம், கிளிநொச்சி மற்றும் மன்னார் ஆகிய மாவட்டங்களிலும், அனுராதபுரம், புத்தளம், திருகோணமலை, கொழும்பு மற்றும் கல்முனை ஆகிய பகுதிகளிலும் ‘PM10’ மற்றும் ‘PM2.5’ ஆகிய மாசுத் துகள்களின் செறிவு உயர்ந்துள்ளமை கண்டறியப்பட்டுள்ளது. இலங்கையின் காற்றின் தரக் குறியீட்டின் அடிப்படையில், வெளிநாடுகளிலிருந்து வரும் காற்றோட்டத்தினால் ஏற்பட்டுள்ள இந்தச் சூழலானது சுவாசப் பிரச்சினைகள் உள்ளவர்கள் மற்றும் உணர்திறன் கொண்ட நபர்களின் ஆரோக்கியத்தைப் பாதிக்கக்கூடும் என அதிகாரசபை சுட்டிக்காட்டியுள்ளது.
இத்தகைய வளிமண்டல நிலைமை எதிர்வரும் நாட்களிலும் தொடரக்கூடும் என்பதால், முன்னெச்சரிக்கை நடவடிக்கையாக ‘N95’ முகக்கவசங்களை அணியுமாறு பாதிப்புக்குள்ளாகக்கூடிய தரப்பினருக்கு அறிவுறுத்தப்பட்டுள்ளது. அத்துடன், சுகாதார அமைச்சினால் வெளியிடப்பட்டுள்ள சுகாதார ஆலோசனைகளைப் பொதுமக்கள் தவறாது பின்பற்றுமாறு வலியுறுத்தப்பட்டுள்ளதுடன், இது தொடர்பான மேலதிக தகவல்களைத் தேசிய காற்றின் தர இணையதளத்தில் (aq.cea.lk) பெற்றுக்கொள்ள முடியும் எனவும் குறிப்பிடப்பட்டுள்ளது.
தேசிய சுற்றாடல் சட்டத்தின் ஏற்பாடுகளுக்கு அமைய வளிமண்டல நிலைமைகளைத் தொடர்ச்சியாகக் கண்காணித்து வருவதுடன், ஏற்படும் மாற்றங்கள் குறித்துப் பொதுமக்களுக்கு உடனுக்குடன் அறிவிக்கப்படும் என மத்திய சுற்றாடல் அதிகாரசபை மேலும் உறுதிப்படுத்தியுள்ளது.


